KALIBO, Aklan—Uman nga paga-istoryahan sa Sangguniang Bayan it Malay ro ginaduso nga pagpasugot sa operasyon it habal-habal sa Isla it Boracay.
Suno kay Malay sangguniang bayan member Alan Palma Sr., sambilog sa mga main sponsor it proposisyong ordinansa nga una eon raya sa refinement period agud nga matan-aw ro tanan nga probisyon.
Ginpahayag dugang nga maabong mga indigents ro gustong mapabahin sa proposisyong ordinansa.
Sa pihak kara, ko adlaw it Martes hay nakipagpueong raya sa sangguniang panlalawigan angot sa pag-amienda it naga-eksister nga ordinansa angot sa annual permit to operate it mga pribadong motorsiklo.
Gin-insister ni Palma nga himuong 3 years validity ro permit to operate it mga pribadong motorsiklo agud mabuhinan ro discomfort, inconvenience ag pagdueotdutan it mga motorsiklo sa isla it Boracay.
Samtang, ginklaro man it opisyal nga separado ro ordinansa para sa habal-habal ag para sa private use.
Dugang pa kara nga ro may mga existing permit to operate ag mga indigent ro pwede nga mapabahin sa nasambit nga proposisyong ordinansa.
Patumod mat-a sigon sa polusyon sa hangin, kumbinsido si Palma nga ro mga bag-ong modelong motorsiklo hay pasado sa stardard ag uwa masyadong nagabuga it aso.
Ro pagsuporta sigon sa proposisyon hay makabulig sa turismo sa isla bangud nga bukon it tanan hay naseserbisyohan it e-trike.
Uwa eon it tradisyunal nga tricycle nga nagabyahe sa nasambit nga isla.
