KALIBO, Aklan—Owa it anuman nga natabu nga aktibidad sa baybayon nga sakop it barangay Tambak sa banwa it New Washington angot sa selebrasyon it kapiestahan ni San Juan de Bautista makaron nga adlaw it Biyernes.
Raya hay kabaliskaran sa nagtaliwan nga mga dinag-on antes ro pagtama it pandemya, kun sa siin ginadayo it maabu nga mga tawo ro barangay Tambak bangud sa mga pa-contest eabi eon ro karera it baroto.
Suno kay Lucille Macario, punong barangay it nasambit nga lugar nga kueang sanda sa preparasyon kamana man nga makalikaw sa pagkalhit it COVID19.
Ro ginapasugtan eamang makaron hay ro pagpaligos sa dagat ag ro pagtipon-tipon it mga magpamilya sa gintukod nga mga tolda.
Angot kara, nagpaandam si kapitan Macario sa mga nagapaligos sa baybay nga magdoble dahan agud nga indi ma-atake it mga dikya nga nauna eon nga naispatan ko nagtaliwan nga mga inadlaw.
Dugang pa ro pagpadumdum sa mga ginikanan nga bantayan it mayad ro andang mga unga ag limitahan eamang ro pag-inom it aeak agud nga makalikaw sa aksidente, gulo ag insidente it pagkaeumos.
Sa pihak nga parte, bangud sa pagdagsa it tawo, hugut nga seguridad ro ginapatuman sa lugar it kapulisan kabulig ro mga miyembro it MDRRMO ag mga tanod.
