KALIBO, Aklan—Owa it kapatawaran ro gin-obra nga brutal nga pagpatay sa anang unga.
Raya ro ginpahayag ni Bonifacio Ambay, ama it biktimang si Bonna Hercia Ambay, pawnshop manager-reliever it RD Pawnshop Mabini St. Kalibo Branch.
Suno kana nga masyadong masakit sa andang pamilya ro gin-obra it suspek nga si Mark Archie Torrefiel, gwardiya sa nasambit nga pawnshop kat matabu ro krimen.
Bilang sangka ama, grabeng kasubo sigon ro anang nabatyagan kun sa siin ro andang bilog nga pamilya hay nagaluksa sa pagkamatay ni Bonna nga suno kana hay mabuot ag masinueundon nga unga.
Makaron nga presente eon nga nakakulong sa kampo krame ro suspek matapos nga magsurender, pursigido sigon sanda nga magpasaka it kaso agud nga mataw-an it hustisya ro makangieidlis nga pagpatay sa anang unga.
Sa pihak nga parte, nagapati ro pamilya Ambay nga nagagamit it iligal nga droga si Torrefiel bangud sa haeos 18 nga igo it pagbuno sa nagkaeain-eain nga parte it eawas.
Suno kay Bonifacio nga nagakasubo sigon imaw bangud nga makaron pa eamang imaw nakakabawi sa anang mga unga pagkatapos nga maging overseas Filipino worker sa sueod it 15-anyos.
Haeos owa sigon nana nasubaybayan ro pagbahoe ni Nonna ag ko anang magueang bangud sa trabaho sa ibang nasyon.
