KALIBO, Aklan—Ginmandu ni department of interior and local government ukon DILG secretary Eduardo Año ro pag-relieve kay Bureau of Fire Protection (BFP) – Region 6 Regional Director F/SSUPT Roderick Aguto bangud sa napabalita nga pag-eabag sa quarantine protocol it sangka personnel it BFP nga ginasugid nga nag-warang sa isla it boracay nga owa pa nakaguwa ro resulta it anang RT PCR test sa COVID-19 nga ko ulihi hay nasayuran nga positibo sa sakit.
Suno kay Año nga owa nanda gina-tolerate ro saea nga ginahimo it mga tawuhan it BFP ag iba pang personnel it DILG.
Sa makaron nga tiempo nga may pandemya suno kana hay indi puwede ro mga palusot ag kinahangean nga magpakita it mayad nga halimbawa.
Ginbutang ni Año si F/SSUPT Jerry D. Candido, Director for Logistics it BFP-National Headquarters bilang OIC it BFP-Region 6.
Ginmanduan man it opisyal si BFP Chief Jose Embang nga magpatigayon it imbestigasyon pinaagi sa ginbilog nga Special Investigation Task Group ag isumite kana ro resulta kara.
Nagapadayun makaron ro contact tracing sa mga posibleng nakasalamuha it 26 anyos nga BFP personnel.
Nagpatigayon man it swab testing ag ginpaidaeum sa quarantine ro tanan nga mga personnel nga nakaangkon it close contact sa pasyente.
Ginpaidaeum man sa lockdown ro BFP-6 Regional Office, andang provincial office sa Aklan, ag iba pang mga fire stations ag ginlaygayan nga magpatigayon it instriktong sanitation ag disinfection sa natungdan nga mga opisina.
