KALIBO, Aklan — Ginpaathag it Municipal Disaster Risk Reduction and Management Office ukon MDRRMO-Kalibo nga kon pagasundon ro criteria nga gintaeana it NDRRMC, ro numero it kaso ukon insidente it dengue sa bilog nga banwa it Kalibo hay bukon it bastante agud nga ma-justify ro deklarasyon it state of calamity .
Suno kay Terrence June Toriano , head it MDRRMO-Kalibo nga sa bag-ong memorandum order it NDRRMC , kinahangean nga 15 porsiyento it populasyon hay apektado it nasambit nga sakit.
Ginpahayag dugang nga ro numero hay dapat nga nakabase sa percentage ag bukon it sa aktwal nga numero.
Kinahangean man sigon nga raya hay science based projection nga nagakinahangean it emergency assistance.
Suno pa kay Toriano nga posibleng makadeklara it state of calamity kon may dengue outbreak eon sa sangka banwa .
Sa pihak nga parte, gin-engganyo nana ro tanan nga magpasakop sa maeapnagon nga clean-up drive sa Hulyo 16 nga kon sa siin magataeana it sang oras agud nga magpanglimpyo sa mga eskwelahan, opisina ag komunidad .
Indi dapat suno kana nga magpadaog sa kahadlok nga nabatyagan bangud nga ro pagtapna sa sakit nga dengue hay owa nagakinahangean it mabahoe nga pondo kundi ro pagtapna kara ukon prevention ro kinahangean sa makaron.
Pagbueuligan sigon it tanan nga mapabaskog ro anti dengue campaign ro dapat nga himuon ag ro pagduso sa 4S nga ginaeakipan it pag-usoy ag pagsamad sa mga lugar nga gina-itlugan it mga namok, pagsuksok ag paggamit it mga proteksyon kontra sa sugod it namok, insigidang magpa-check-up sa doktor kun may eagnat nga masobra eon sa 2 adlaw ag pagsuporta sa pagpapa-asu sa lugar nga may napabalitang pagkalhit it dengue.
