KALIBO, Aklan—Matsa naging fiesta ro pagdihon it certificate of candidacy (COC) sa Commission on Elections (Comelec-Kalibo) it mga kandidato it Tibyog Akean.
Matapos ro ginpatigayon nga santos nga misa sa St. John The Baptist Church agahon it Martes, nagderetso ro grupo sa pagpanguna ni incumbent Kalibo Mayor Juris Sucro kaibahan ro anang ka-tandem nga si incumbent Vice Mayor Dr. Cynthia dela Cruz ag waeo nga Sangguniang Bayan members sa old building it munisipyo it Kalibo agud nga mag-file it andang natungdan nga COCs sa municipal Comelec office sa idaeum it local party nga Tibyog-Akean.
Apang naging makahawat-hawat ag hugut nga gin bantayan it tanan ro hueag ni Mayor Sucro kat owa imaw nagdungan it pag-file it kandidatura sa anang mga kaibahan.
Nakita man ro anang presensiya sa AVR it Aklan State University ukon ASU Kalibo campus, ro gintaeana nga venue para sa mga maga-file it COC sa provincial position.
Apang ko ulihi, nagdihon man imaw it anang COC bilang alkalde it Kalibo.
Uman nga naging masadya ro karsadahon nga gin-agyan it mga kandidato bangud sa ginpatigayon nga sadsad ukon street dancing kaibahan ro dating nagrambolan nga bandang Lagalag ag Bayangan village nga libreng nag offer it andang serbisyo bilang pagpakita it suporta kay Mayor Sucro.
Nauna kara, uman nga nakita ro presensiya it daywang nasambit nga banda sa bag-o eamang natapos nga Opening Salvo it Kalibo Sr. Sto. Niño Ati-Atihan Festival sa Enero 2025 matapos nga bawion it alkalde ro anang ginpaguwa nga executive order nga naga-bawae kanda sa magpasakop sa event bangud sa gintuga nga gulo ko nagtaliwan nga selebrasyon.
Samtang, may libre man nga henna tattoo nga logo it Bagong Kalibo ro mga nagsunod sa parada.
Kaibahan sa pormal nga nag-file it COC sanday incumbent SB members Atty. Kristine dela Cruz, Ronald Marte, Ketchie Luces, Raymar Rebaldo, Matt Aaron Guzman ag dating Kalibo mayor Engr. Emerson Lachica nga nag-ober-da-bakod sa andang grupo, dating provincial board member Lilian Quimpo-Tirol ag retired Kalibo Municipal Assessor Engr. Rex Bautista.
Samtang, nagfile bilang independent sa pagkabise alkalde si Philip Kimpo nga magatapos ro anang termino bilang konsehal it Kalibo.
