KALIBO, Aklan—Sa pagguwa-sueod it mga tawo sa probinsya it Aklan hay kinahang-ean nga may regulasyon para ma minimize ro pagkalhit it 2019 coronavirus diesease ukon Covid-19.
Raya hay kasunod sa pagdeklara sa Western Visayas bilang low risk sa sakit rason nga ginbutang sa modified general community quarantine it Inter-Agency Task Force on Emerging Infectious Diseases.
Suno kay Galo Ibardolasa it Provincial Disaster Risk Reduction Management Council ukon PDRRMC Aklan nga maskin ginhaeogaan pa it husto ro movement it mga tawo sa bilog nga probinsya it Aklan hay nagpaguwa gihapon it executive order si Gov. Florencio Miraflores kon sa siin nakabaehag ro mga sueondanan para eubusang malikawan ro pagkalhit it virus.
Ro Aklan malang sigon ro may kaparehas kara nga tikang kon sa siin ginabueo ro impormasyon it mga natungdan nga pasahero nga nagasueod sa probinsya para sa mas madasig nga contact tracing engkaso nga may madugang sa kaso it Covid-19.
May ginkriar sigon nga system ro gobyerno probinsyal nga uploaded ro personal information it mga nagasueod sa probinsya nga naga-agi sa mga border control checkpoints partikular sa provincial boarder sa Altavas, Nabas, Buruanga ag Caticlan jetty port.
Ginpaathag ni Ibardolasa nga ro pagstrikto it gobyerno probinsyal hay malikaw ro tanan sa makamaeatay nga virus bangud nga uwa eon it restrictions makaron halin kat ginpaidaeom sa MGCQ ro Aklan.
