KALIBO, Aklan–Mabahoe nga bugae ag dungog nga maeakip ro isla it Boracay sa Time Magazine ‘50 World’s Greatest Places of 2022.’
Raya ro ginpahayag ni Nenette Aguirre-Graf, stakeholder ag board of trustee it boracay foundation incorporated.
Apang ro panibag-ong pagkilaea suno kana hay may kaibahan nga mabahoe nga responsabilidad bukon eamang it sa mga taga-malay ag aklan kundi sa bilog nga nasyong Pilipinas.
Kinahangean suno kana nga ma-sustain ro pagtatap it palibot eabi pa ag ro nagapangunang atraksyon kara hay ro anang maputi ag pino nga baeas ag malimyo nga baybayon.
Sa pihak suno kana it natabu, ginaeauman nga ro pagkilaea it nasambit nga award-winning publication hay makabulig agud nga maabot it nasyon ro anang target nga uman nga maibalik sa dating posisyon sa global market.
Madumduman nga ko 2018 hay an-um nga buean nga ginpasarado ro boracay matapos nga bansagan ni pangueong Rodrigo Duterte nga cesspool.
Sa pihak nga parte, maskin nga owa pa eubusan nga natapos ro pag-ayos sa drainage system ag mga karsadahon sa isla, apang sa pangkabilugan hay ginakilaea ag ginapasaeamatan sigon it mga taga-boracay ro madinaeag-on nga pag-rehabilitate it Boracay sa idaeum it Duterte administration
Ginturn-over eon suno kana ro nasambit nga mga proyekto sa LGU malay kasunod it pagtapos it termino it boracay inter-agency task force.
