LEZO, Aklan — Owa it “foul play” sa pagkamatay it sangka 51 anyos nga eaeaki nga nagpaligos sa swimming pool it sangka resort sa Brgy. Sta. Cruz, Lezo, hapon it Domingo, Hunyo 8, 2025.
Suno sa Lezo Municipal Police Station nga kumbinsido ro pamilya nga owa it senyales nga ginhungod ro pagkamatay it biktimang si Francisco Eruelas, residente it nasambit nga lugar ag aksidente eamang ro natabu nga pagka-eumos nana.
Ro biktima hay napan-uhan it pilang mga nagapaligos man nga naga-eutaw-eutaw eon sa haeos 5 feet nga kadaeumon it portion it pool sa sueod it nasambit nga farm resort pasado alas-3 it hapon pilang minutos matapos imaw nga nag-eusong sa tubi.
Base sa CCTV footage, makita nga nag-eumpat imaw sa sangka parte it pool ag makataliwan ro kapin sa ap-at nga minutos hay owa eon imaw nakabutwa.
Sa pagresponde it mga tawuhan it MDRRMO Lezo, ginhimo pa nanda ro tanan agud nga maeowas ro kabuhi ni Eruelas, apang gindeklarang dead on arrival sa Aklan Provincial Hospital.
Sa makaron hay gina-imbestigahan pa it Lezo MPS ro nasambit nga insidente it pagkaeumos.
Nasayuran nga kaibahan it biktima ro anang mga kabarkada nga nag-excursion sa lugar.
Dugang pa nga una raya sa impluwensiya it aeak kat magpaligos sa pool.
