KALIBO, Aklan—Patay ro numero uno nga lider it mga terorista nga Al Qaeda nga si Ayman al-Zawahiri sa Afghanistan kahapon, adlaw it Martes.
Si Ayman al-Zawahiri hay naapuruhan sa ginpatigayon nga drone strike it United States.
Suno kay Bombo International Correspondent Pinoy Gonzales it Texas, USA nga bangud sa natabo ginpabugae gid raya ni US President Joe Biden.
Makabig sigon nga sangka mabahoe nga kadaeag-an para sa Amerika ro natabo bangud sanda mismo ro nakapatay sa nagapanguna nga lider it terorista sa Afghanistan.
Sa makaron ginatutukan man it US military ro pag-usoy sa masunod nga nagapangunang lider it mga terorista sa nasambit nga nasyon.
Raya hay para mapakita man sa mga teroristang grupo ro determinasyon it Amerika nga sanda hay tapnaon.
Sa pihak nga parte, nagpaandam man ro Pangueo nga paga-usuyon ag pagapasabton it Amerika ro sin-o man nga magatuga it peligro sa andang mga pumueoyo.
