KALIBO, Aklan — Eubos nga ginkasubo it sangka Pinoy tourist ro pagkasunog it Notre Dame Cathedral, sambilog sa pinaka kilaea nga simbahan sa Europa ag natiempo pa sa Semana Santa.
Sa mensaheng ginpa-abot ni Dr. Regina Ruiz Buenaflor, masakit sigon sa buot nga makita nga gina-eamon it kaeayo ro makasaysayang 850 year old nga simbahan.
Nasayuran nga si Dr. Buenaflor ag ro anang pamilya hay katatapos eamang nga magbakasyon sa nasambitan nga lugar ku nagtaliwan nga domingo./
Kat una na sigon nga makita ro simbahan hay magkahalong kasadya ag kasubo ro anang nabatyagan.
Na-amazed sigon imaw sa kanami kara apang nasubuan man bangod napinsar na nga ro katuyuan eamang it kaabuan sa mga turista hay agod magpamasyas ag magpa-litrato ag bukon it magpangamuyo.
Sangkiri eon lang man suno kana ro nagasimba sa mga manami nga simbahan sa Europa.
Sa pagkasunog it nasambitang simbahan makaron nga Kuwaresma, ginpahayag ni Dr. Buenaflor nga medyo gustong ipahiwatig it Diyos nga magbalik loob kana pinaagi it pagpangamuyo ag mas pa nga pabaskugon ro pagpasalig kana.
