KALIBO, Aklan – Gintaw-an it pagkilaea ag apresasyon it lokal nga gobyerno it Kalibo ro pitong mga media outlets sa Aklan nga nagpakita it kaisog para magsunod ag ibalita ro mga natabo sa Atin Ito Mission sa West Philippine Sea ku buean it Mayo paagi sa pagpasa it sangka resolusyon.
Suno kay Sangguniang Bayan Member Ronald Marte nga raya nga inisyatibo ag ginproponer ni Sanguniang Kabataan president Benz Carl Regalado nga ginpaboran man it bilog nga konseho.
Paagi sigon kara hay maapresyar ro presensya it nasambitan nga mga katapo it media.
Dugang ni Marte nga ro mga media ro nagabueo ag nagadaea it balita sa publiko eabi eun parte sa water dispute sa WPS sa tunga it China ag Pilipinas.
Bangud sigon kara mataw-an it kasayuran ag matuod nga impormasyon ro mga Kalibonhon ukon Aklanon parte mga nagakatabo idto.
Masayuran nga ginhiwat ro civilian mission agud nga magdaea it supply sa nasambitan nga kaeawran sa pagpanguna man ni Mayor Juris Sucro.
Antes nga nagpanaw, may mga natabo man nga briefing sa tanan nga partisipante it resupply mission.
Paathag pa ni Marte raya hay nagasaeaming sa kaisog it mga Pinoy nga pangapinan ro WPS ag soberanya it nasyon kontra sa mga pagpangbully it mga Tsino.
Dugang pa nana nga haom imaw bilang sangka Pilipino sa bisan ano man ro mahimo nga matabo sa paeaabuton.
