KALIBO, Aklan–Nagapabilin nga maeanghay ro pamaligyaon it paeupok sa banwa it Banga, limang adlaw antes ro pagsug-aeaw it bag-ong dag-on.
Suno kay Emilyn Quindong, sangka firecracker vendor nga nag-umpisa sanda sa pagbaligya it paeupok ko Disyembre 22 apang matumal ro andang benta makaron kumpara ko nagtaliwan nga dag-on.
Posible sigon nga nakaapekto kara ro maeain nga tyempo ag krisis nga na-eksperyensyahan it mga pumueoyo.
Nakaangkon man sigon it pagtaas sa presyo it mga paeupok.
Nagaeaum sigon sanda nga magabuhos ro mga bumaeakae samtang nagahilapit ro bag-ong dag-on.
Angot kara, regular sigon sanda nga gina-inspeksyon it mga katapo it Bureau of Fire Protection (BFP) ag Banga PNP para masiguro ro safety.
Pila sa mga gin-required kanda hay ro baeas, tubi, fire extinguisher ag sang metro nga agwat it kada stall kamana man ro pagbutang it “no smoking” ag “no testing” sign.
