KALIBO, Aklan — Puno it kasubo ro pamilya it sangka Pinoy seaman nga naduea ag ginapatihan nga nahueog sa barko samtang nagabyahe maghalin sa China paadtu it Pilipinas ku Agosto 3.
Sa interview it Bombo Radyo, ginpahayag ni Mrs. Josephine Repiedad, ina it tripulanteng Pinoy nga si Paul JQ Repiedad, 32, residente it Barangay Linabuan Norte, Kalibo, Aklan nga nakikipag-angot sanda makaron sa manning agency it anang unga agud nga masayran ro matuod nga natabu.
Ulihi nga nakita si Repiedad it kapareho nga mga crew alas-6:30 it gabie ku Biyernes nga naga-ihapon ag ginpahisayud sa pamilya ro pagkaduea kara ku Domingo it agahon.
Nagpatigayon man it search and rescue ro pamunuan it barko, apang napas-eawan raya nga makita.
Nasayuran nga balak pa kunta ni Repiedad nga makipagkita sa anang misis sa pagdungka it andang barko sa Pilipinas.
Maga sang dag-on pa eamang nga kasae ro seaman sa anang asawa.
