Nagapati ag kampante ro pamilya it sangka 30-anyos nga eaeaki nga owa it natabu nga foul play sa anang pagkamatay.
Raya ro ginpahayag ni P/Capt Donie Magbanua, acting chief of police it balete municipal police station angot sa pagkamatay it biktimang si Eduardo Ilarina Jr., owa it asawa, ag residente it Brgy. Arcanghel Norte, Balete.
Nasapwan imaw ko agahon it domingo nga owa eon it kabuhi ag naga-eutaw-eutaw sa sangka dam sa Brgy. Arcanghel Sur sa nasambit nga banwa.
Sangka post mortem examination sigon ro ginpatigayon agud nga matumod ro rason it anang pagkamatay, apang owa pa it resulta hasta sa makaron. Kumbinsido ro pamilya nga owa it anuman nga makadueuda sa anang pagkamatay ag posibleng samtang nagapamunit hay gulpi raya nga inatake it anang sakit nga epilepsy ag nahueog sa tubi rason nga imaw hay naeumos nga naging rason it anang pagkamatay.
Base sa imbestigasyon nga ko sabado nga adlaw, marso 29 hay nataeupangdan it anang ina nga owa ro biktima sa anang gina-istaran nga baeay ag pagka-aga hay nakita raya nga owa eon it kabuhi.
