KALIBO, Aklan—Ginaengganyo makaron ko pamunuan it St. Jhon the Baptist Cathedral ro tanan nga manugsilimba nga magsuksok it face shield mag-eowas pa sa mandatory nga pagsuksok it face mask.
Raya hay kasunod sa mandato nga ginpaguwa it National Task Force on Covid-19 nga maging mandatory eon ro pagsuksok it face shield sa mga commercial establishment.
Suno kay Fr. Tudd Belandres, Kora Paroko it Kalibo Cathedral nga kon raya ro makamayad para sa tanan agud nga makabulig sa pagtapna ko pagkalhit it virus nga nagadaea it sakit nga coronavirus disease hay magasunod ro simbahan.
Ro may mga face shield sigon hay mahimo nga isuksok eon raya makaron nga adlaw sa pagsueod it simbahan ag ro mga nabudlayan sa pagginhawa hay naintindihan man sigon nanda bangud nga may suksok man nga face mask.
Ginpahayag dugang Fr. Belandres nga magasunod ro simbahan sa anumang health protocols nga igapatuman it gobyerno kon sa siin makit-an man ro mandatory nga pagsikyar sa body temperature ko mga manugsilimba, pagtapak sa foot bath, pagspray it alcohol, mandatory nga pagsuksok it face mask ag ro pag-obserba sa physical distancing.
Nataeopangdan man sigon nana ko nagtaliwan nga dominggo nga haeos tanan hay nakasuksok man it face shield ag nagapati imaw nga bukon it malisod pakiusapan ro mga parishioners.
