KALIBO, Aklan—Naging neutral si Pangueong Rodrigo Duterte sa naging kapalaran it franchise renewal it broadcast network nga ABS-CBN.
Suno kay Aklan 2nd District Congressman Ted Haresco nga owa nagpasilabot si Duterte sa pagdesisyon it manaba nga kapueungan it kongreso ag ginpabay-an nga magboto sandig sa andang konsensiya.
Gindugang pa kara nga 104 sa 302 nga mga kongresista hay naga edad it 40 anyos panaba rason nga indi basta-basta nga mabakae ag madiktahan.
Ginpaathag ni Cong. Haresco nga ro naputoe eamang hay ro andang operasyon it radyo ag telebisyon sa bilog nga nasyon bangud sa pag-expire it andang prangkisa, apang owa man ginpasarado ro andang korporasyon.
May option pa sigon ro network agud nga magpadayun sa andang operasyon pinaagi sa pagbaligya it andang mga shows sa netflix, kamana man sa ibang mga TV stations sa sueod ag maskin sa guwa it nasyon.
Madumduman nga gintutukan sa hearing it kongreso ro pilang kontrobersiya nga nakaputos sa ABS-CBN nga ginaeakipan it citizenship it andang chairman emeritus nga si Gabby Lopez, gina-alegar nga pag-eabag it network sa labor laws, owa pagbayad it tamang buwis, political bias ag iba pa.
