KALIBO, Aklan—Sa pihak nga may paghana sa uman nga pagnaba it produktong langis sa masunod nga dominggo, ginpahayag it asosasyon it mga tricycle drivers nga uwa gihapon raya it epekto sa andang adlawan nga kita bangud nga nagapabilin sa dati ro panueoktan it pamasahe sa banwa it Kalibo.
Suno kay Antonio Nama, presidente it Kalibo-Poblacion eastern side terminal nga inde gihapon nanda mabatyagan ro epekto sa pagnaba ko presyo it langis bangud sa bigtime price increase kara ko nagtaliwan nga dinominggo.
Mag-eowas kara, nagapabilin sa dati nga panueoktan ro pamasahe ag sa kaabuon it mga tricycle nga nagabyahe hay mataas eon sa daywang ka pasahero ro andang maisakay sa paglibot it mga raya sa banwa it Kalibo.
Sa pihak kara, ginapasaeamatan gihapon nanda ro pilang piso nga rollback sa gasolina ag hinyo it mga raya sa kumpanya it mga langis nga padayunon pa gid ro pagnaba sa presyo kara bilang pagkonsidera eon man sa kalisod nga andang ginapas-an makaron.
Samtang, nagpanawagan si Nama sa natungdan nga ahensya it gobyerno kon sin-o ro makasabat sa andang kutana may kaangtanan sa ginaeauman nga fuel subsidy nga kapin sa P6,500 pesos.
Bilang presidente it asosasyon hay imaw permi ro ginakinutana it anang mga kaibahan rason nga nagahinyo raya sa natungdan nga ita-o eon kanda ro ginaeauman nga subsidiya para makabulig man sa andang presenteng sitwasyon.
