KALIBO, Aklan—Para sa pormalidad eon lang ro ginpatigayon nga eleksyon sa pagpungko ni Leyte Representative Martin Romualdez bilang Speaker it House of Representatives.
Suno kay Aklan 1st district congressman Carlito Marquez nga daywang domingo antes ro pagbukas it 19th Congress hay nakaangkon eon it consensus ro mga partido nga imaw ro igabutang nga lider it Kamara.
Halin sa 309 House members, 282 ro nagboto para kay Romualdez, igkampod ni Pangueong Ferdinand “Bongbong” Marcos, Jr., samtang ap-at ro nag-abstained ag 22 man ro owa nagboto.
Gindugang pa ni Marquez nga owa eon it ibang gin-nominate.
Nasayuran nga si Romualdez nga nagsirbi bilang House majority leader sa 18th Congress, hay gin-nominate it anang gumankon nga si Ilocos Norte Representative Ferdinand Alexander “Sandro” Marcos, ro unga it pangueo.
Ginpaathag ni Marquez nga sa idaeum it House rules, ro mga owa nagboto para sa nagdaog nga speaker hay magabilog it Minority bloc.
Ro mga miyembro it Minority bloc ro maga-elect man it andang magiging lider.
