KALIBO, Aklan—Bangud sa nagapabilin nga sangkiri ro mga flights nga nagahugpa sa Kalibo International Airport, ginakabig it tricycle transport nga mamaea-maea gid ro andang pagbyahe adlaw-adlaw.
Suno kay Bernie Almero, presidente it Pook Airport Tricycle Operators Driver’s Association ukon PATODA nga mataas eon ro daywa hasta tatlong trip kon swertehon sa adlaw-adlaw nanda nga pagbyahe bangud nga may 50 sanda ka miyembro ag tanan raya hay rotation.
Bukon sigon it bastante ro andang kita para sa kinahang-eanon it andang pamilya rason nga ginaeakipan nanda raya it paglibot-libot sa banwa it Kalibo agud nga maskin papaano hay madugangan ro andang kita nga igauli sa andang pamilya.
Mag-eowas kara, nagahinyo sanda it konsiderasyon sa mga pasahero nga madugangan ro pamasahe sa andang kada trip para makabawi manlang sa andang ginatayon nga gasolina.
Angot kara, panawagan nanda nga kunta madugangan ro flights it mga airline companies nga magahugpa sa Kalibo International Airport para mabuhi man ro andang pangabuhian.
