KALIBO, Aklan—Ginpasiguro it Philippine Coast Guard ukon PCG-Aklan ro padayun nga pagtau it bulig sa mga naga-aeabutan nga locally stranded individuals ukon LSIs.
Suno kay Senior Chief petty Officer Dominador Salvino, deputy commander it PCG-Aklan nga maid-id ro andang pag-usisa sa mga dokumento it mga LSIs partikular ro bag-ong gindugang nga requirement nga letter of acceptance halin sa natungdan nga mga LGUs.
Raya hay magapamatuod suno kana nga may nagakaigo nga koordinasyon ro andang pag-uli ag may magasueang kanda pag-abot sa Caticlan jetty port.
Ro iba pang dokumento nga dapat nga daea it mga LSIs hay ro medical certificate ag travel authority.
Gindugang pa kara nga sanda man ro nagapatigayon it pag-check sa body temperature it mga pasahero gamit ro thermal scanner.
Ginasiguro man sigon nanda nga indi makaguwa sa andang holding area ro mga LSIs nga owa it sueang.
Samtang, gindugang pa ni Senior Chief petty Officer Salvino nga ginahueat eon lang nanda ro resulta it ginpatigayon kanda nga real-time reverse transcription polymerase chain reaction ukon RT-PCR test ko martes matapos nga magpositibo ro sambilog sa andang katrabaho nga sangka 25 anyos nga babaye.
Kumpiyansa sigon sanda nga maga negatibo ro resulta bangud sa pagpati nga owa nabo-oe it pasyente ro infection sa Caticlan.
Padayun sigon nga naka-lockdown ro andang opisina sa caticlan ag partially lockdown ro Boracay office samtang naka-quarantine sanda nga 20 nga mga personnel.
