KALIBO, Aklan—Pila sa mga mangunguma sa Aklan hay nagapahaum eon sa posibleng epekto sa pagtama it El Niño phenomenon sa masunod nga mga binuean sa Pilipinas.
Kapareho it sangka mangunguma nga bangud sa tiempo it tag-init ag naka-ani eon it tanum nga paeay hay gin convert anay ro kaeanasan sa taeamnan it melon ag pakwan.
Apang suno kay Erlyn cual nga nalugi imaw it haeos P50,000 pesos sa pag-invest sa pagtanum it melon ag pakwan ko nagtaliwan nga daywang buean bangud sa owa ginaeauman nga pagtama it grabeng tag-uean.
Uman sigon imaw nga nagsugae sa pagtanum it kaparehong produkto apang ro naging problema nanda makaron hay ro kakueangan it tubi.
Agud nga madiligan ro andang mga tanum hay nagagamit sanda it water pump.
Positibo imaw nga makabawi sa dating pagkalugi sa nakataeana nga pag harvest it anang mga tanum nga melon.
Suno kana nga engkaso nga makaangkon it El Niño hay magatutuk sanda sa mga pananum nga makasarang sa init it adlaw.
