KALIBO, Aklan—Gin-anunsyo it Provincial Veterinary Office nga ro pilang mga banwa sa probinsiya it Aklan nga dating apektado it African swine fever ukon ASF nga gusto eon kunta nga magpa-upgrade sa pink zone hay uman nga bumagsak sa test.
Raya ro ginpahayag ni Dr. Ivy Lachica it OPVET-Aklan .
Suno kana nga nagapabilin sa idaeum it red zones ukon infected area ro mga banwa it Ibajay ag Tangalan matapos nga uman nga nagpositibo sa sakit it baboy ro ginsumite nga blood sample .
Ginlaygayan sigon nanda ro mga natungdan nga LGU nga magpatigayon it surveillance, investigaton ag sample testing kamana man nga i-regulate ro movement ukon pagpaguwa it buhi nga baboy ag mga pork products.
Sa pihak nga parte, ginpahayag ni Dr. Lachica nga pito nga banwa sa aklan ro nadeklara nga una eon sa pink zone nga ginaeakipan it mga banwa it Balete, Banga, Malinao, Madalag, New Washington, Makato ag Kalibo.
Ro mga raya suno kana hay nagapahaum eon para sa “sentinelling program” ukon naga-testing nga mag-alaga it baboy kun sa siin ro Department of Agriculture hay nagapanupod it “sentinel pigs” ag mga feeds sa mga beneficiaries agud nga maumpisahan ro hog repopulation program.
Raya hay gina-obserbahan sa sueod it 40 days ag kon indi magpakita it signs and symptoms it ASF hay uman nga pagataw-an it dugang nga orok nga paga-obserbahan eon man sa sueod it 40 days ag kon makapasa hay pwedeng ipa-upgrade sa yellow zone.
Ro banwa pa eamang sigon it Buruanga ro nakapasa sa yellow zone.
Sa pihak nga parte, ro mga banwa it Malay, Nabas, Lezo, Batan, ag Libacao hay padayun pa nga ginaproseso ro andang mga ginsumite nga dokumento ag blood samples agud nga ma-convert sa pink zone.
Padayun nga ginapadahan it OPVET ro mga hog raisers bangud nga mabahoe gihapon ro posibilidad nga magkalhit ro ASF bangud nga nagapabilin nga owa pa it bakuna para kara.
