KALIBO, Aklan — Angot sa nagahilapit nga pagsueod it “ber” months ag 2025 election hay nagpaandam ro kapulisan sa publiko kontra sa mga pekeng kwarta.
Raya hay matapos nga may pilang mga vendors sa banwa it Kalibo ag Numancia ro nabiktima gamit ro peke nga 1,000 peso bill.
Nagpakuno-kuno sigon nga customer ro daywang kaeaeakin-an nga nakasakay sa motorsiklo ag nakasuksok it helmet ag face mask.
Panawagan it mga otoridad nga insigidang mag-report sa pinakamaeapit nga police station ro sin-o man nga mabiktima it pekeng kwarta agud nga mataw-an it nagakaigo nga aksyon ag madakpan ro posibleng naga-obra kara.
Gina-abiso pa nga pirmeng i-double check ro mga ginabaton nga mabahoe nga kantidad kapareho it kwartang papel nga nagabalor it 1,000 ag 500 pesos eabi eon kon nagasinsilyo agud nga indi mabiktima it mga manugloko.
Nasayuran nga ro pekeng kwarta hay owa it nagakaigo nga security features ag matsa ordinaryong papel kon ginakumos kon sa siin owa nagabalik sa anang dating itsura.
