KALIBO, Aklan–Gina-engganyo it Philippine Red Cross (PRC)-Aklan Chapter ro mga pumuoeyo nga magpasakop sa andang ginapatigayun nga blood letting activity makaron nga Blood Donors Month.
Suno kay Mary Jo Galleon, administrator it PRC-Aklan Chapter nga raya hay bukas para sa 18 hasta 60-anyos nga gustong magdonar it andang dugo.
Kada tatlong buean sigon pwedeng magdonate it dugo.
Base sa pagtuon it mga eksperto, ro pagdonate it dugo hay nagapamanmi sa kondisyon it tagipusuon.
Naganaba man ro risgo it heart disease ag heart attack bangud nababawasan ro nakabara sa aeagyan it dugo paadto sa tagipusuon.
Sa pag-donate it dugo hay insigida nga nai-improve ro overall cardiovascular health.
Raya hay bangud nga natigayun nga mapanaba ro kaabu it cholesterol para maprotektahan ro tagipusuon sa anumang baeatian.
Ro eawas it donor hay nababayluhan eagi ro naduea nga dugo it bag-ong blood cells.
Mag-euwas kara, manaba man ro risgo nga ma-develop ro cancer, mapabilin nga healthy ro atay ag maabo nga iba pa.
Ginpahayag dugang nga mas nagahaba ro kabuhi it mga tawong naga-donate it dugo sa kaabu it mga medical benefits kapareho it pagnaba it oxidative stress sa blood vessels.
Ro pagdonate man it dugo hay makabulig nga masalbar ro kabuhi it mga pasyente nga nagakinahang-ean it insigidang blood transfusion.
