KALIBO, Aklan—Nag-umpisa eon nga magtaas ro presyo it kada kilo it bugas sa mga nagapangunang merkado sa nasyon.
Suno kay Michael Reyes, rice vendor sa Kalibo Public Market nga nakaangkon it sangkiri nga pagtaas sa presyo it bugas nga andang ginabaligya.
Raya hay kasunod it pagtaas man it presyo it kada kilo it paeay nga nagahampang sa P21 hasta P22 bangud nga owa eon haeos it mabakae nga suplay kara sa Aklan.
Sa makaron, ro regular nga bugas hay nagabalor eon it P37 halin sa dating presyo nga P35.
Ro presyo suno kana hay naka-depende sa klase it bugas nga ginabaligya.
Owa sigon sanda it mahimo kundi magsunod sa daeagan it presyo agud nga makabawi sa andang capital.
Nauna eon nga ginpaathag it Department of Agriculture ro posibilidad nga makaangkon it paghueag sa presyo it bugas sa nasyon.
