KALIBO, Aklan — Ginkundina it Bagong Alyansang Makabayan (Bayan)-Aklan ro gina-alegar nga pagpamaeag ag harassment kanda it military.
Suno kay Kim Sin Tugna, provincial coordinator it Bayan-Aklan nga antes ro andang madinaeag-on nga marcha protesta kadungan sa ika-40 nga anibersaryo it EDSA People Power Revolution ko adlaw it Miyerkules hay gina-alegar nga ginpaandaman it military ro pila sa mga pumueuyu nga gustong magpasakop.
Ro andang protesta halin sa Crossing Banga-New Washington paagto sa Kalibo Pastrana Park.
Mag-eowas kara, ginbanatan man nana ro National Task Force to End Local Communist Armed Conflict (NTF-ELCAC) kun sa siin maskin ro andang target hay ro CPP-NPA-NDF apang ro andang gina-atake hay ro mga legal nga organisasyon kapareho it Bayan kun sa siin gina akusahan nga mga terorista ag recruiter.
Bangud kara, kaabuan sigon sa andang mga kaibahan hay naging biktima it extra judicial killings ag Enforced desaparecidos nga matapos nga kidnapon it mga awtoridad sa idaeum it civil military operation hay owa eon nakita hasta makaron.
Nagpanindugan si Tugna nga indi nanda pagpaeampason ro gina-alegar nga pagpang-harass it militar sa andang linya bangud eamang sa andang pakikibaka para sa kamaeayran it mga pumueuyu nga naga-antus bangud sa mga nagakatabu nga maeapnagon nga korapsyon ag iba pang anomaliya sa gobyerno nga ginahimo it mga burukapitalista.
