KALIBO, Aklan—Plano ni 1st district board member Nemesio Neron ag chairperson it committee on disaster preparedness nga magapatigayon it legislative inquiry angot sa mga ginapatigayon nga quarry operation sa probinsiya it Aklan.
Raya hay kasunod it naexperiensiyahan nga maeapnagon nga pagbaha sa probinsiya ko nagtaliwan nga Oktubre 27 antes pa man ro pagtama it bagyong Paeng sa nasyon.
Suno kana nga sa Lunes hay igapaabot nana sa plenaryo sa regular session it Sangguniang Panlalawigan ro nasambit nga plano.
Kaeabanan suno kana nga nagabo-oe it sand and gravel ro mga naga-quarry sa bibi it suba ag bukon it sa tunga.
Uman kara nga ginproponer nga kinahangean nga ma-akad ro Aklan river agud nga mabo-oe ro mga sand bars.
Tuyo sigon kara nga magdaeum ag maging tayuyon ro pag ilig it tubi sa suba.
Dapat suno kana nga maeakot sa plano ro natungdan nga ahensiya it gobyerno kapareho it DPWH, Aklan Environment and Natural Resources Office ukon AKENRO, DENR, Environmental Management Bureau ukon EMB, ag Mines and Geosciences Bureau ukon MGB.
Sa pihak nga parte, ginpaabot ni neron nga bangud sa climate change hay kinahangean nga maging haum ro publiko sa pagtama it mga mabaskog nga bagyo , madaeum nga baha ag iba pang kalamidad.
