KALIBO, Aklan—Fully booked eon ro reservations para sa mga gustong magpa-obra it dried ag fresh flower bouquets sa pilang flower shops sa banwa it Kalibo.
Suno kay Rian Fernandez, sambilog sa mga staff it Floral Matters nga Enero pa eamang hay nagsaka eon ro demand sa mga gustong magpa-obra it bouquet.
Bukon it kapareho sa mga ordinaryong okasyon nga madahog ro mga dried flower boquets, makaron nga Valentine’s Day hay in-demand ro andang mga fresh flowers.
Sa pihak kara, nagapabilin sanda nga bukas sa mga walk-in clients, apang indi pa ma-determina sa makaron ro enksantong presyo eabi eon sa mga fresh flower arrangements.
Dugang pa nga ro mataas nga demand halin sa customers ag ro mataas nga presyo halin sa andang suppliers ro naka apekto sa presyo it pilang bueak.
Ro sangka bouquet suno kana hay naga-range ro presyo sa P2,000 hasta P4,000 depende sa numero ag klase it bueak.
May mga kahigayunan man sigon nga may nagapa-obra kanda it bouquet nga may budget nga P10,000.
Samtang, nagabaligya man sigon sanda it mga local ag imported nga roses and tulips nga naga-average sa P100 per piece.
Sa pihak nga parte, sa mga flower shops sa kahabaon it Roxas Avenue, Kalibo, makita man makaron ro nagkaeain-eain nga klase it bueak nga naka-display sa nagkaeain-eain nga floral arrangements ro ginabaligya bilang pagpahaum man sa selebrasyon it Valentine’s Day sa Biyernes, Pebrero 14.
