BUSINESS News — Medyu pakonswelo sa mga motorista ro ginpatuman nga sangkiri nga bawas presyo sa mga produktong petrolyo it mga kompanya it langis sa nasyon nga ginpatuman sa mismong adlaw it bisperas it Bag-ong Dag-on.
Sa abiso it mga kompanya it langis sa nasyon nga ginpangunahan it Pilipinas Shell, Petron Corporation, Seaoil, PTT Philippines, Total Philippines, Unioil, Petro Gazz ag Phoenix Petroleum, nagpatuman sanda it bawas presyo nga P0.30 sa kada litro it gasolina ag diesel samtang P0.90 man sa kada litro it kerosene nga naging epektibo kaina it alas-6 it agahon.
May sangkiri nga bawas presyo man sa mga nasambit nga produktong petrolyo sa kaparehong kantidad ro kompanyang Caltex ag CleanFuel nga magiging epektibo alas-12:01, aga-aga it Miyerkules.
Ro ginpatuman nga bawas presyo sa mga produktong petrolyo hay tuga it padayun nga paghueag it presyuhan kara sa world market.
Madumduman nga ko nagtaliwan nga adlaw it Martes hay nagpatuman ro mga kompanya it langis sa nasyon it dugang presyo nga P0.50 sa kada litro it gasolina, P1.45 sa kada litro it diesel, ag P0.75 sa kada litro it kerosene.
