KALIBO, Aklan — Nagpangayo it pasaylo ro sangka bagitong Akeanon vlogger nga si Ronnel Rovero Pelonio it Banga matapos imaw nga mag-viral bangud sa anang gin-obra nga video angot sa mga taga banwa it Libacao partikular sa andang sanduko.
Sa interview it Bombo Radyo, ginpahayag ni Ronnel nga nagkapatawaran eon sanda it sambilog pang vlogger nga si MJ vlog nga taga banwa it Libacao pinaagi sa ginbilog nanda nga GC ukon group chat .
Nag-sorry man si Ronnel sa anang mga followers nga nadismaya bangud sa anang naging video eabi eon ro mga taga Banga.
Sa nasambit nga video, ginkontra it vlogger ro pahayag it kaparehong vlogger nga ro sanduko it Banga hay putoe ag dangae kumpara sa talibong it Libacao.
Ginpahayag man nana sa anang content ro sikat nga linya it mga taga-Libacao nga “gin-eagnat ro talibong kon indi maka-eabu.”
Dugang pa kara nga gindepensahan eamang nana ro anang banwang tinubuan kamana man ro pag-bully kana.
Angot kara, nagpasaeamat man imaw sa Bombo Radyo sa kahigayunan nga mabatian ro anang parte ag sa mga netizen nga nagpuna sa anang pagkasaea.
Suno kana nga kon owa ro anang mga bashers hay owa man imaw it mga viewers nga importante kana bilang vlogger.
Bangud sa leksyon nga naangkon, ginpasiguro nana nga paga-obrahon ro tanan agud nga makahimo it mas mapuslanon nga mga videos nga indi makasakit sa baeatyagon it iba.
Sa pihak kara, ginklaru nana nga for entertainment eamang ro andang content ukon videos nga gina-obra.
Nasayuran nga si Ronnel hay nag umpisa eamang nga maging vlogger makaron nga 2024.
