KALIBO,Aklan– Pursigido nga makaangkon it medalya ro sangka Aklanon wushu athlete nga sambilog sa mga delegado it Western Visayas sa Palarong Pambansa 2023 nga igapatigayon sa Marikina City.
Si Aicel Isturis, 15-anyos, sangka grade 10 student it Aguinaldo Repeidad Integrated School hay idto makaron sa Marikina City kaibahan ro iba pang atleta agud nga makipagsambuwa sa mga atleta it ibang rehiyon.
Suno kana, una imaw nga nagkainteres sa nasambit nga hampang kat grade 7 pa eamang imaw kon sa siin nakitaan it potential it mga coaches ag trainors hasta nga ginpadayon nana ag nakaabot sa Palarong Pambansa.
Makaywang beses imaw nga naghampang sa Western Visayas Regional Athletic Association ukon WVRRA Meet ag raya sigon ro anang unang kahigayunan sa Palarong Pambansa.
Nauna eon nga ginpahayag ni Hernani Escullar Jr., tagapaghambae it Department of Education (DepEd)-VI nga uwa it dapat ikabaeaka ro ginikanan it mga natungdan nga atleta bangud maayos ro andang akomodasyon ag seguridad.
Naga-abot sa 813 ro kabilugan nga delegasyon it Western Visayas nga ginakaeakipan it 539 nga players, 131 coaches, assistant coaches ag chaperones kamana man 143 nga technical working group.
