Padayun nga gina-reklamo it mga residente it Barangay Manggan sa banwa it Banga ro kabudlay nga andang naeksperyensiyahan bangud sa peligro nga daea it pagpanaeasa it sangkaterbang eangaw sa andang ikamayad nga eawas.
Suno kay Punong Barangay Relito Revesencio it nasambit nga lugar nga nag-umpisa ro kalbaryo it mga pumueuyu ko 2015 pagkatapos nga matukod ro poultry farm ko 2010 nga gina-alegar nga ginapanag-iyahan it pamilya ni Aklan 2nd District Congressman Carlito Marquez.
Mag-eowas sa andang barangay, ginpahayag ni kapitan Revesencio nga apektado man ro mga pumueuyu it barangay it Libas, Tabayon, Mambog ag Pagsanjan bangud sa sangkaterba sigon ng eangaw nga haeos nagatumpok-tumpok sa guwa ag sueod it andang baeay.
Nauna eon nanda nga ginreklamo ro problema sa Department of Environment and Natural Resources ukon DENR Region 6, apang sa pag-usisa hay pasado ro farm sa environmental law.
Bilang presente nga presidente it Liga ng mga Barangay sa banwa it Banga hay ginpaabot man nana ro problema kamana man sa Sangguniang Bayan, apang owa pa it nagakaigo nga aksyon.
Nagakangawa pa sigon imaw nga maskin owa it clearance halin sa andang barangay council hay na-isyuhan ro kompaniya it business permit halin sa LGU.
Plano ni Kapitan Revesencio nga i-finalize ro andang committee investigation eakip ro natipon nga mga pirma it mga residente sa ginpatigayon nga signature campaign agud nga ipasa kay Congressman Marquez.
Tuyo kara nga makapatuman ro farm it mga mitigating measures agud nga makontrol ro mga eangaw eabi eon sa tiempo it pag-harvest it mga manok nga ginapatigayon kada bueaN.
Nagaeaum sanda nga masolusyunan ro andang problema sa eangaw bangud nga nakasalalay sigon ro andang ikamayad nga eawas.
