Kalibo, Aklan-Nagpaabot it kabaeaka ro sangka environmental group kasunod it nadiskubrehan ag nakit-an nga development sa kagueangan sa isla it Boracay nga ginakabig nga ilistaran it mga ginakabig nga endemic nga klase it mga fruit bats nga flying foxes.
Suno sa grupo nga Friends of the Flying Foxes Boracay, ro development project it sangka pribadong kompanya sa kagueangan it Brgy. Yapak hay sa mismong sangka forest ag ginakabig nga protected area rason nga nagapangayo sanda makaron it eksplinasyon sa lokal nga gobyerno ag mismong sa Department of Environment and Natural Resources ukon DENR kon ham-an it ginpasugtan ro proyekto sa nasambit nga lugar.
Apang, sa sangka interview, ginpahayag ni Malay Sangguniang Bayan member Alan Palma Sr., nga ro nasambit nga lugar hay titulado ag plano nga butangan it pribado nga port it kompanya nga Golden TW Realty and Development Corporation. Gin-endorso gid man sigon raya it Sangguniang Bayan apang natamaan imaw nga absent kat gin-aprubahan ro endorsement ko nagtaliwan nga dag-on.
