KALIBO, Aklan — Nagpaandam ro sangka health expert kontra sa respiratory illnesses ag potensyal nga peligro sa ikamayad nga eawas it ashfall.
Raya hay kasunod it pagsabog it Bulkang Kanlaon sa Negros Island.
Sa interview it Bombo Radyo Kalibo, ginpaathag ni Dr. Philip Ian Prieto it UP-Visayas nga ro volcanic ash ukon abo halin sa bulkan hay ginaeakipan it mga pino ag masyado kaisot nga mga particles nga madaling makasueod sa baga.
Posible suno kana nga mairita it volcanic ash ro respiratory tract, eabi eon para sa mga indibidwal nga nakaka-eksperyensiya it ashtma ag chronic obstructive pulmonary disease.
Pwede man raya nga magtuga it pagpuea it mga mata, pagkatoe ag pagsakit it mata.
Dugang pa nga ro mabuhay nga exposure sa abo halin sa bulkan hay nagatuga it skin rashes.
Ro ashfall man sigon hay pwedeng makadugang sa peligro it waterborne diseases.
Masyado sigon raya nga peligroso eabi eon sa mga direktang naapektuhan it pagsabog it Bulkang Kanlaon.
Sa pihak nga parte, ginkumpirma ni Ms. Irene Bel Ploteña head, it PDRRMO Negros Occidental nga nagapabilin nga una sa alert level 3 ro Bulkang Kanlaon nga buot hambaeon nga may magmatic unrest.
Suno kana sa idaeum it nasambit nga alert level, ginarekomenda ro insigidang pagbakwit it tanan nga mga residente sa sueod it 6-kilometer radius halin sa alipunto it bulkan.
Ginpahayag dugang nga padayun sanda nga nagabantay kaibahan ro Phivolcs para sa anumang pagbag-o sa aktibidad it bulkan.
Nagaeaum sanda nga makaangkon it uean sa lugar agud nga makabulig sa ginapatigayon nanda nga flashing kontra sa nagakalhit nga mga abo.
Madumduman nga sumabog ro Bulkang Kanlaon bandang alas-5:51 it agahon it Martes, nagbuga it madamoe nga aso nga nag-abot sa ginaboeobanta nga 4,000 metro ro kataason.
