Uwa eon it kabuhi kat nakit-an ro bangkay it sangka lolo matapos nga inanod sa kasagsagan it pagpanaeasa it maeapnagong pagbaha sa bilog nga probinsya it Aklan tuga it epekto it nagtaliwan nga bagyong Paeng.
Ginkilaea ni P/Capt. Bryan Alamo, hepe it Lezo Municipal Police Station ro biktima nga si Teddy Martelino y Cahilig, 74-anyos, residente it Brgy. Poblacion, Lezo.
Nakit-an ro lolo kasunod sa ginpatigayon nga search and retrieval operation nga ginpangunahan it Lezo PNP kaibahan ro Lezo MDRRMO, Aklan PDRRMO, ag PCG personnel.
Ginpahayag dugang ni PCapt. Alamo nga ro bangkay ni Martelino hay nakit-an bandang alas-2:00 it hapon sa may riverbank nga sakop it Brgy. Sta. Cruz, Lezo.
Una kara, nagreport sigon ro pamilya ni Martelino sa andang taeatapan bandang alas-6:00 it gabie matapos nga uwa eon raya nakauli halin sa pagsalbar kunta sa anang baka nga nakagihit sa andang taeamnan.
Ginpahayag dugang nga uwa it kaibahan ro biktima kat natabo ro aksidente kon siin posible suno kay PCapt. Alamo nga inanod raya it mabaskog nga sueog it tubi-baha nga gulpyadang nagtaas sa Aklan river bangud sa sigidas nga pagbuhos it uean.
Ro bangkay it nasambit nga biktima hay ginpaidaeom sa post mortem examination para masayuran ro kinamatay it nasambit nga lolo
