KALIBO, Aklan—Dead on arrival sa Madalag district hospital ro sangka nursing student matapos nga maeomos sa Macapio river, sangka river resort nga makit-an sa Brgy. Logohon sa banwa it Madalag.
Ginkilaea ro biktima nga si Karen Tumaca, 20-anyos ag residente it banwa it Malay.
Sa nabuoe nga impormasyon it Bombo Radyo, naimbitahan eamang ro biktima sa birthday it anang land lady kaibahan ro anang nobyo ag manghod kara nga ginhiwat sa nasambit nga river resort.
Natyempo sigon nga uwa it nakastand by nga life guard sa oras nga nagpaligos ro biktima.
Nakaabot raya sa madaeom nga porsyon it suba nga ginahambae nga may lilo.
Nataeopangdan pa nga nagapakitabang ro daeaga nga insigida man nga ginbuligan it anang nobyo apang maskin ro eaeaki hay ginahatak man paidaeom it tubi.
Madaeom sigon nga porsyon it suba ro naadtunan it biktima rason nga maskin kaantiguhan raya mag-eangoy hay naeomos gihapon imaw.
