KALIBO, Aklan—Ginklaro ni May Castillo, tagapaghambae it Department of Social Welfare Development (DSWD) nga ro nakataeanang umpisahan nga ipanupod nga cash assistance sa idaeom it Social Amelioration Progarm ukon SAP it gobyerno makaron nga dominggo hay ro para sa mga benepisyaryo nga nakasueod sa left outs ko unang tranche it ayuda.
Ginapaspasan eon sigon nanda ro validation ag verification agud nga maipasaalima eon sa mga benepisyaryo ro financial assistance.
Nauna kara, nagpaguwa ro central office it Memorandum circular No. 14 kaangot sa dugang nga benepisyaryo it nasambit nga programa.
Raya hay kaparte it dugang nga 5 milyon families sa bilog nga nasyon kon sa siin nagpaguwa it dugang nga guidelines ro ahensya.
Ro kwalipikado sa nasambit nga ayuda base sa ginpaguwa nga guidelines it ahensya hay ro senior citizen nga may pension P6,000 pesos panaba; barangay nutrition scholar ukon BNS ag health workers nga honorarium eamang ro ginabaton ag ro mga bukon it miyembro it 4P’s ukon uwa eon sa roster it andang ginikanan partikular ro may mga kaugalingon eon nga pamilya.
Nauna eon man nga ginpahayag it ahensya nga kinahang-ean nandang himuon ro validation and verification process para masigurado nga uwa it maga-doble sa makabaton it ayuda ag maadto raya sa dapat nga benepisyaryo ag minatuod nga apektado it krisis.
