KALIBO, Aklan — Kasado eon ro security plans it Aklan Police Provincial Office (APPO) sa selebrasyon it kaugalingon nga bersyon it Ati-Atihan festival sa banwa it Ibajay sa maabot nga Enero 25 hasta 26.
Suno kay P/Capt. Aubrey Ayon, tagapaghambae it APPO nga haum eon ro mga kapulisan it Ibajay Municipal Police Station ag ro mga augmentation force halin sa iba pang mga municipal police station sa Aklan.
Naka deploy eon sigon ro mga kapulisan sa mga estratehikong lugar sa banwa umpisa ko Lunes sa pag umpisa it mga event agud nga masiguro ro seguridad it mga magatambong sa selebrasyon.
May igabutang sigon sa national highway nga mga pulis ag iba pang karsadahon nga magabantay sa daeagan it trapiko.
Nasayuran nga kada dag-on hay linibu nga mga deboto ro nagatambong sa dag-unan nga selebrasyon it Ibajay Ati-Ati.
Pilang mga tawo ro nagahaboy it andang mga tuwalya ag panyo agud nga ipahid sa imahe matapos nga maisaylo ro ginasugid nga milagrosong kahoy nga Sto. Niño de Ibajay halin sa kumbento paagto sa simbahan it parokya kada Sabado it udtro adlaw.
