Nakaplastar eon ro mga tikang sa seguridad sa pag-umpisa it 133 nga cardinal para sa sekretong conclave, adlaw it Miyerkules, Mayo 7, agud nga magpili it masunod nga Santo Papa.
Ro Sistine Chapel, kilaea sa mga obra maestra ni Michelangelo, hay temporaryo nga gin-obra nga medyu pinakamanami ag pinaka-eowas nga bunker sa kalibutan.
Nagbutang ro mga Vatican techncians it naka-elevate nga saeog nga may mga nakatago sa ubos nga sophisticated anti-surveillance measures sa pihak nga bukon it sigurado ro mga detalye nga gintau it mga opisyal, kun sa siin ginasugid nga posibleng ginhungod para sa seguridad.
Kaibahan sa mga ginabati-bati nga istorya hay ro mga signal-jamming device nga posibleng nakatago sa idaeum it saeog ukon maeapit sa mataas nga bintana it chapel nga may kataason nga haeos 70 feet.
Nagbutang man it mga espesyal nga tiles agud nga baeabagan ro signal it mobile phones ag protective film sa mga bintana agud nga pugngan ro mga drone camera nga makalingling.
Hugut nga ginabawae ro paggamit it cellphone.
Ko 2013, sa ulihing conclave, ginasugid nga gingamit ro sangka Faraday cage agud nga baeabagan ro mga electromagnetic signal, makabig nga mga high-tech nga tikang nga uman nga igapatuman makaron.
Para masigurado ro kasagraduhan ag pagiging sekreto it proseso, pagapatyon ro mga Vatican cellphone tower umpisa alas-3 it hapon it Miyerkules hasta nga maipahayag ro bag-ong papa.
Bukon pa it klaru kon maapektuhan ro mga signal halin sa mga tore sa guwa it pader it Vatican sa Roma.
Ro mga cardinal, nga tanan hay owa pa it 80 anyos hay magaboto it hasta sa ap-at nga beses kada adlaw.
Ro chimney nga bag-ong kabit sa tuktok it chapel hay magapaguwa it itom nga asu kun owa pa it Santo Papa nga nailihir ukon puting asu kon nakapili eon it ika-267 nga pontiff.
Samtang sa conclave, magapabilin ro mga cardinal sa Santa Marta residence sa sueod it Vatican City, nga owa eon nagbaton it mga bisita umpisa ko nagtaliwan nga domingo.
Gin-inspeksyon it mga security team ro lugar, ginsarado ro nagapangunang pwertahan ag ginmanduan ro mga cardinal nga mag-agi sa sangka side entrance.
Ginasugid nga ginpahina man ro Wi-Fi access sa sueod it building.
Makaangkon it “security envelope” nga magabantay sa mga cardinal maskin siin man sanda maga-agto. Paga-ibhan sanda it mga gendarme it Vatican ag mga plainclothes nga Swiss Guards sa matag-od nga biyahe halin sa chapel paagto sa residence, gamit ro bus ukon pagtikang sa Vatican gardens.
Ro mga tawuhan, kaibahan ro mga kusinero, tagalimpyo, ag kleriko hay nagpanumpa it hasta nagakabuhi nga sekreto angot sa anuman nga andang masaksihan ukon mabatian. Ro penalidad sa maga-eabag kara hay awtomatikong excommunication halin sa Catholic Church.
Samtang ro bilog nga kalibutan hay naga-abang sa puti nga asu, ro matabu sa ssueod it Sistine Chapel hay magapabilin nga sangka sagradong sekreto.
