Nagpanawagan ro sangka kagawad sa nagkaeain-eain nga mga telecommunications company, power service providers ag mga natungdan nga ahensiya it gobyerno nga himuson ag boe-on eon ro mga hazardous ag magulo nga mga “spaghetti wires” sa national highway nga sakop it Barangay Panayakan sa banwa it Tangalan.
Suno kay barangay kagawad cyrus Magallanes nga may pilang aksidente eon ro natabu sa andang lugar matapos nga pilit nga ginalikawan eabi eon it mga truck ro mga nakalaylay nga kable.
Ginpaabot eon sigon nanda ro andang reklamo sa natungdan nga kompaniya, apang puro promisa eamang nga agtunan ag owa man gin-aksyunan.
Ginareklamo man nanda ro owa pag-ea-ong it mga raya sa tag-ana it eugta antes nga mag-install it mga cable wires.
Apela pa nana nga boe-on eon ro mga nagabaeanggangat nga mga wires bangud nga mag-eowas nga nagatuga it traffic obstruction hay eye sore pa raya sa mga naga-agi nga turista paagto sa isla it Boracay.
Ro mga “spaghetti” wires hay ginapanag-iyahan it mga telephone, internet ag cable television service providers, kamana man it local power distribution utility.
Ginpahayag ni Kagawad Magallanes nga pila sa mga wires hay makabig eon nga samad ag owa eon naga-function.
