BALITA Espesyal–Nagapangatubang sa kaso ro sangka eaeaking turista matapos nana nga ipaagi sa makasaysayang Spanish Steps it Roma sa Italy ro anang ginamaneho nga luxury car, rason nga masamad ro sikat nga landmark.
Sa sangka CCTV footage, makitang nagpundo sa tunga it sikat nga hagdan ro kotse, ag nagpanaog ro 37-anyos nga driver kara nga taga-Saudi.
Medyu nabudlayan pa raya kon anong diskarte ro paga obrahon agud nga mabo-oe ro anang saeakyan.
Ginasugid nga ginpadayun it driver ro pagpanaog sa 136 nga halintang it hagdan antes eubusan nga nagpaeagiw.
Nadakpan it mga awtoridad ro eaeaki bangud nga gin-rentahan eamang nana ro kotse kun sa siin gintau man it rental company ro detalye it suspek.
Nadakpan imaw sa Malpensa aiport kat ginbalik ro gin rentahan nga saeakyan.
Suno sa suspek, nagkasaea imaw sa pagliko rason nga naagto imaw sa Spanish Steps ukon mas kilaea sa Italy bilang Scalinata di Trinita dei Monti.
Sikat raya nga landmark nga ginpatindog ko 1726 ag sa idaeum it pagdumaea it Superintendence for Cultural Heritage it Roma.
Matapos ro insidente, nasamad ro daywang halintang it hagdan, ag nakitaan man it mga crack ag gasgas ro iba pang parte it 300 years old nga landmark.
Nagpaidaeum sa daywang dag-on nga restoration ro makasaysayang landmark umpisa ko 2016, nga umabot ro gastos sa $1.6 milyon dollars ukon katumbas it P84 milyon pesos.
Bangud sa mga panibag-ong kahalitan, pagakasuhan ro turista it aggravated damage to cultural heritage and monuments.
