KALIBO, Aklan — Ginkalipay it Boracay Inter Agency Task Force (BIATF) ro uman nga pagpanguna it isla it Boracay bilang “best island” sa bilog nga Asya sa sangka international travel magazine.
Suno kay Boracay Inter-Agency Rehabilitation Management Group (BIARMG) general manager Natividad Berdandino, ro pagkilaea it Conde Nast Traveler sa Boracay hay ginakabig nanda nga recognition sa resulta it ginhimo nga rehabilitasyon it gobyerno sa kooperasyon man it mga stakeholders ag mga pumueoyo.
Nasayuran nga sa pinakaulihing survey nga ginpaguwa it nasambit nga travel magazine, nagpanguna ro sikat nga isla sa 2019 Readers’ Choice Awards nga ginpartisiparan it masobra sa 600,000 voters.
Nakasueod man sa pangaywang puwesto ro Cebu ag iba pang isla sa Pilipinas; nagpangatlo ro Penang sa Malaysia; ika-ap-at ro Palawan ag sa ika-limang puwesto mat-a ro Bali sa nasyong Indonesia.
Sikat ro Boracay sa maputi ag matsa-pulbos nga baeas kamana man sa mala-kristal ag asul nga tubi-dagat nga patok sa mahilig magtampisaw ag magpatigayon it snorkeling.
