KALIBO, Aklan — Nagpaathag makaron si Department of Environment and Natural Resources (DENR) Undersecretary Benny Antiporda kaangot sa reklamo ni Peter Tay, sangka negosyante sa isla it Boracay nga imaw sigon ro ginpakahuy-an, ginkwelyuhan ag ginpaandaman inde pagtaw-an it Certificate of Compliance it nasambitang opisyal.
Sa press conference ni Usec. Antiporda sa Boracay, ginpamalibaran kara ro mga pabangod it negosyante.
Paathag it opisyal nga paano kara masakit si Peter Tay bangud mas mataas raya kana ag bukon kara it buyot ro Environmental Management Bureau nga naga-isyu it Certificate of Compliance.
Sa kamatuoran sigon, si Tay ro nag-gate-crash sa ginpatigayong close door meeting it Compliant Association of Boracay ko Nobyembre 2, kon siin, gintalakay ro kaangot sa mga concerns it operators it water sports ag hotels and resorts sa bag-ong patakaran it Boracay inter-agency task force, kon siin, gin-insister ni Tay nga malugi kara ro andang negosyo.
Sa uman nga pagkita it daywa ko Lunes sa ginpatawag nga pueong it CAB para sa mga travel agency operators, nakaangkon it diskusyon ro daywa ag napikon si Antiporda rason nga ginpaguwa it venue ro negosyante.
Gintik-eod na sigon raya paguwa it pertahan kat naghana raya nga mag-eapit kana.
Apisar nga haom sa anumang kasong igadihon it negosyante sa Office of the Ombudsman, bukas gihapon ro opisyal nga makipaghinun-anon kay Peter Tay.
Nakabaehag sa bag-ong patakaran it task force nga ro mga turistang magapatigayon it water sports activities hay kinahang-ean nga sa mga hotels ag resorts eon magpa-book agud malikawan ro mga commissioners nga mangulit sa mga bisita sa front beach.
