NATIONAL News — Kapin sa 37 nga overseas Filipino workers (OFWs) ro maga-abot makaron nga adlaw, Oktubre 14 sa Pilipinas halin sa Lebanon matapos ro serye it Israeli airstrikes nga naging rason it maeapnagon nga pagkaguba it southern part it nasambit nga nasyon.
Raya ro nagtueod kay Pangueong Ferdinand Marcos Jr. agud nga imandu sa tanan nga ahensya it gobyerno nga gamiton ro tanan nga resources para boe-on ro mga Pilipino halin sa peligro.
Nauna kara, ginpahayag it Presidential Communications Office (PCO) nga dugang nga 37 nga Filipino ro magahalin sa Beirut makaron nga adlaw ag maga-agi sa Istanbul, kun sa siin ginaeauman nga maga-abot sanda sa Pilipinas hindunang gabi-i.
Personal sigon nga nakita ni Philippine Ambassador to Lebanon Raymond Balatbat ro pag-halin it mga raya sa Beirut airport, samtang ginsug-aeaw sanda ni Ambassador Henry Bensurto ag Philippine Consulate officials sa andang pag-abot sa Istanbul.
Suno sa PCO, may kabilugan eon nga 442 nga OFWs ag 28 dependents ro ginpa-uli halin sa Lebanon hasta ko Oktubre 12.
Kaibahan sa nasambit nga numero ro siyam nga Pinoy nga nag-abot sa Pilipinas ko adlaw it Domingo.
Ro pinakabag-ong mga pag-abot it OFWs hay sa tunga it nagapadayun nga bagina sa tunga it Iran-backed ag Lebanon-based Hezbollah ag Israel, rason nga ginpasaka it Pilipinas ro Alert Level 3 sa Lebanon ko October 2023.
Samtang, kapin sa 571 nga Pilipino ro nagpahayag it andang kahauman nga mag-uli it Pilipinas.
Sa nasambit nga numero, 221 ro haum eon nga mag-uli samtang 350 nga iba pa ro ginaproseso it Lebanese immigration.
Nasayuran nga sa kabilugan nga 11,000 nga Pilipino sa Lebanon, kaabuan kara hay sa Beirut, nga ro nagapangunang trabaho hay domestic workers.
