KALIBO, Aklan—Kapin sa 48 ka miyembro it Philippine Coast Guard (PCG) Boracay ag Aklan ro nakataeana nga i-swab test makaron nga adlaw kasunod it pagpositibo sa Covid-19 it 25-anyos nga babaye nga temporaryong gin-assign sa Caticlan Jetty Port.
Suno kay Senior Chief Petty Officer Dominador Salvino, deputy commander it PCG Aklan nga ko July 7 pa nanda nasayuran nga nagpositibo ro sambilog nanda nga kaibahan sa trabaho apang inde pa matumod sa makaron kon siin nabueo it pasyente ro nasambit nga sakit.
Kaangot kara, ginmanduan sigon sanda nga inde makipaghalubilo sa mga tawo kaeakip eon kara ro mga tawuhan it PCG Boracay nga nakaadto sa andang opisina.
Agud nga inde maapektuhan suno kana ro andang trabaho hay nag-augment ro PCG Capiz kon sa siin sanda sa makaron ro temporaryong nagadumaea it operasyon sa pantalan samtang naka-lockdown sanda nga mga personnel.
Ginapangamuyo sigon nanda sa makaron nga maging negatibo ro resulta it swab test nga igapatigayon kanda makaron nga adlaw.
Nasayuran nga ro nasambit nga PCG personnel hay nakataeana sa inspection department it pantalan sa mga nagaabot nga pasahero halin sa Batangas ag Mindoro port.
Hulyo 1 kat nagbyahe raya halin sa Caticlan paadto it PCG Regional Office sa Iloilo ag nagdayon sa sangka inn sa sueod it daywang adlaw.
Nagsakay imaw it barko it PCG ko Hulyo 3 halin Iloilo paadto it Maynila ag pag-abot idto pagkaagahon hay ginpaidaeom sa RT-PCR test, kon sa siin nadiskubrehan nga positibo sa nasambit nga sakit.
Naka-quarantine eon sigon raya sa Athlete’s Village sa Capas, Tarlac ag nagapabilin nga asymptomatic.
