KALIBO, Aklan—Ginkumpirma it pamunuan it Pantawid Pamilyang Pilipino Program ukon 4P’s sa probinsya it Aklan nga bukon sanda it kwalipikado sa educational assistance sa idaeom it Assistance to Individuals in Crisis Situation ukon AICS it Department of Social and Welfare Development ukon DSWD nga nag-umpisa ro pay-out ko nagtaliwan nga adlaw it Sabado Agosto 20 ag magabuhay hasta sa Setyembre 24 it presenteng dag-on.
Suno kay Beverly Salazar, 4P’s director sa Aklan nga ko una sigon ro ginpaguwa nga statement hay para sa tanan nga indigent kon siin kwalipikado kara ro 4P’s beneficiaries apang ko ulihi hay ginbawi raya it DSWD pinaagi man sa pronouncement ni Secretary Erwin Tulfo bangud nga may anda eon nga ginabaton nga educational assistance kada daywang buean.
Sa makaron suno kana hay uwa pa sanda nakasayod kon anu ro magiging sitwasyon it ayuda nga na-avail it mga 4P’s beneficiaries ko nagtaliwan nga adlaw it Sabado kon raya hay igabuhin sa anda nga cash grant ukon personal nga igapabalik kanda ro kantidad it kwarta.
Sa pihak kara, nagpanawagan si Salazar sa mga 4P’s beneficiaries nga inde eon maghandom sa nasambit nga ayuda it gobyerno ag ita-o man raya sa ibang nagakinahang-ean.
Madumduman nga gindagsa it maabong ginikanan ag mga estudyante ro unang sabado it pay-out it DSWD nga gustong maka-avail it nasambit nga ayuda.
