KALIBO, Aklan — Nakit-an agahon it Miyerkules sa nabukid nga parte it Barangay San Isidro, Ibajay ro mga toe-an it 74-anyos nga lola nga nauna eon nga napabalita nga naduea it anang pamilya kato pang Agosto 30, 2024.
Ro lola hay residente it Brgy. Aslum sa nasambit nga banwa ag ginasugid nga naga-angkon it Alzheimers Disease.
Suno kay P/Lt. Niña Pagunsan, deputy chief of police it Ibajay Municipal Police Station nga owa gin-report sa andang taeatapan ro pagkaduea it magueang kundi nga gin-post eamang raya sa social media it anang pamilya.
Sangka residente sigon ro nakakita sa mga toe-an it magueang nga insigida kara nga ginpahisayod sa mga awtoridad.
Kat agtunan it pamilya ro lugar, positibo nga gintumod it anang unga nga raya ro andang naduea nga ina pinaagi sa anang suksok nga eambong.
Pagkatapos nga makaangkon it nasambit nga sakit, pirme sigon nga nagapinanaw ro magueang maskin siin nga lugar ag nagapinangahoy.
Samtang, owa it foul play sa pagkamatay kara matapos nga owa it anuman nga lastro nga nakita sa anang eawas base sa pag-usisa it SOCO-Aklan .
Ro anang mga toe-an hay gindaea sa sangka funeral homes ag ginlamayan it pamilya.
