KALIBO, Aklan – – – Nagpamalibad anay nga magtao it anuman nga pahayag ro Commission on Elections (Comelec)-Aklan hanungod sa gina alegar nga nadakpan nga indibidwal nga may daeang mga sobre mga may sueod nga kwarta ag sample ballots sa sueod it anang bag sa Brgy. Unyon, Nabas.
Suno kay Comelec-Aklan spokesman Crispin Raymund Gerardo nga padayun pa nandang gina beripika sa Philippine National Police (PNP) ro mga detalye ag konkretong ebidensiya hanungod sa insidente.
Samtang, gin pahayag ni SPO1 Nida Gregas, tagapaghambae it Aklan Police Provincial Office (APPO) nga natabo ro gina alegar nga vote buying operations kahapon bandang alas-11:00 it agahon apang, bandang alas-8:55 eon it gabie kat gin report sa mga pulis.
Indi sigon mahambae nga “caught in the act” ro pagpamakae it boto it owa anay gin pangaeanang persona.
Nag-panic sigon raya kat mapan-uhan nga maabo ro nakakita sa anang pagpanupod it sobre ag gin hana pang magpaeagyu apang, napugngan raya ag nabo-oe ro anang bit-bit nga bag.
Kat buksan, bumalandra sa mga miembro it gin bilog nga task force it barangay ro napueong sobre nga may sueod nga tig-P300 ag sample ballots.
Gin pahayag pa ni Gregas nga gina tugyan eon lang nanda sa Comelec kun anong kaso ro iga pasaka kontra sa nasambitang persona.
