KALIBO, Aklan — Ginkalipay it aklanon overseas Filipino worker (OFW) sa Kuwait ro nabaton nga award bilang pagkilaea sa anang tumaeagsahon nga kontribusyon sa pagbulig sa anang kaparehong OFW .
Si Dennis Nama Rata, 33 anyos it Brgy. Panipiason, Madalag hay nagbaton it “Bagong Bayani Award 2018” bangud sa hantup sa tagipusuon kara nga pagbulig nga makabalik sa nasyon ro mga OFW nga nakaexperiensiya it pagpang-abuso .
Imaw ro napili nga awardee makaron nga dag-on it Philippine Embassy, Philippine Overseas Employment Administration (POEA) ag Department of Labor and Employment (DOLE) .
Sa interview it Bombo Radyo , ginpahayag ni Dennis nga naging normal eon kana ro pagbulig sa mga kaparehong OFW nga gina-abuso, ginamaltrato ag iba pang klase it pagpabudlay it andang mga employer bukon eamang sa Kuwait, kundi maskin sa Saudi Arabia, Bahrain, Oman ag iba pang nasyon sa Middle East.
Gintau ro award kasunod it Migrant Workers Day kahapon.
Si Dennis hay sangka welder/aluminum installer sa sangka kompaniya sa Kuwait .
Nagtrabaho imaw sa nasambit nga nasyon ko 2014 .
Maskin suno kana nga imaw hay nakabakasyon sa Pilipinas hay padayun ro anang pagbulig .
Sambilog man sigon imaw sa mga lider it Filipino community sa Kuwait.
Nasayuran nga imaw ro kauna-unahang Aklanon nga nakabaton it nasambit nga award.
